خدني الحنين إلى أيام طفولتي أوي
لاقيتني بسرح في أيام بل وسنين عدت عليا كأنها حلم بس كان حلم جميل
بالرغم من كل اللي فيه برضه بقول انه حلم جميل على الأقل اجمل من أيامي بعد ماكبرت
خدني الحنين إلى شقتنا القديمة في الدور الرابع
للشارع الرئيسي اللي كان على ناصيته
عم كمال بتاع اللب وعم صبحي بتاع الفول وعم طلعت بتاع عصير القصب
مكانش يوم يعدي عليا غير لما أزورهم التلاتة وأشتري منهم
خدني الحنين للبنوتة الصغيرة اللي بضفيرة وقُصة وفستان سكري بكرانيش واللي كانت تحب تقعد تلف وتدور بالفستان ده لحد ماتتعب وتقع على الأرض وتقعد تضحك وتضحك ياااااااااااه فين الضحكات دي دلوقتي ؟؟
خدني الحنين لأيام مدرستي الابتدائي الأزهري وزميلاتي اللي كنت بحبهن يااااااااااه دلوقتي اللي اتجوزت منهن واللي معرفش عنهن اي حاجة
خدني الحنين لمدرسة الإعدادي والحوش الكبير اللي كنت بلعب فيه طايرة
وجنينة المدرسة اللي كنت بتدرب فيها للمسرح
والميكرفون اللي كنت بقول فيه الإذاعة المدرسية وكنت تخصص تقديم الإذاعة و قراءة القرآن
فينها أيام المسابقات وأيام التحدي الشريف البرئ بين الطالبات وبيني وبين نفسي
فين أيام الثانوي اللي كنت فيها شقية بس كان المدرسين بيحبوني
فينها خالتي الله يرحمها اللي توفت بعد نتيجة ثانية ثانوي بتاعتي واللي اخر كلمة سمعتها منها
اطلعي دكتورة يارورو علشان تعالجيني وتعالجي اللي زيي
أنا أهو ياخالتو خلاص كلها سنة إن شاء الله وهبقى دكتورة زي ماانتي كنتي عاوزة
بس علشان أحقق حلمك ده اكتشفت ان حاجات تانية ضاعت في طريقي له
ضاعت الضحكة الصافية من قلبي ونادرا لما تيجي تزوره لكن سرعان ماترحل تاني
راح إحساسي زي أي فتاة بسن المراهقة من دلع البنات
طلعت لاقيت مفيش في حياتي غير كتابي وبس
مش مسموح لي إني أهتم بغير مذاكرتي
حتى لعبي ومرحي بقيت أختلس سويعات لتمضيته
ومعنديش دلوقتي غير الحنين اللي بياخدني ويرميني في بحر ذكريات طفولتي
فأسبح وأسبح وأسبح
حتى أكاد أن أغرق في مياهه النقية
حتى أجد مايعكر صفوي بجرس موبايلي اللي معناه
اني لازم أقوم علشان ألبس وأروح الكلية تاركة ورائي شريط ذكرياتي مرمي في بحر عقلي الذي يتزاحم معه كتاب الباطنة والاطفال
************************
عودي اليا يا أيامي ولو لوهلة...أمضي فيكي وقتا كان
وأنت ياحنيني حين تأخدني.. ليتك لا ترجعني إلى هذا الزمان !!
6 comments:
انا اول رد هيييييييييييييييييه
ذكريات بتبقي جمييله اوى
وفعلا مرحلة الطفوله من افضل واجمل المراحل اللي ف عمرنا
بنبقي كلنا نشاط وحيويه والضحكة مش بتفارقنا واللعب والتنطيط
وعقلنا وقلبنا كلهم نقاء
الحمد لله اننا انبسطنا ف حياتنا
اكيد حبه الذكريات الحلوة دى هى اللي مصبرنا ع واقعنا دلوقتى
جميل اووووووووووى , اسلوبك شدنى جامد , تعرفى إن فى حاجات كتير اوى مشتركة معاكى فيها؟ انا كنت باقرأ وانا حسانى انا اللى باتكلم وبنفس- نبرة الحزن , حتى لما قولتى إن خلتك اتوفيت افتكرت خلتى وحزنى عليها , وحضرت ادامى صورتها كاملة وخصوصا ضحكتها ( الله يرحمها ويرحم امه المسلمين جميعا)
سمسمة :
انا اتشرفت اكيد ان تكوني اول رد ربنا يكرمك ياحبيبتي يارب
الحمد لله على كل حال
وانا واثقة ان حتى الايام اللي بنعيشها دلوقتي هتبقى كمان كام سنة ذكرى وممكن نشتاق لها
ربنا يخليكي ياسمكسمتي يارب :)
زي الهوا:
ربنا يخليكي يارب
والحمد لله اني قدرت اوصل احساس وان فيه حد كمان زيي حاسس باللي انا فيه
ربنا يرحم موتانا وموتى المسلمين اجمعين وهيفضل ذكراهم محفور في قلوبنا الى ان نلقام ان شاء الله في العالم الاخر
عالم البقاء واسال الله ان يكون الجنة مسكننا وملتقانا :)
اسعدني مرورك الكريم اوي
يااااااااااااااه
فكرتينى باللذى مضى
فين ايام زمان والضحكه اللى من القلب
بس عامة يعنى كل سن بيكون فيه حاجه حلوه
مش بنعرف انها كانت حلوه الا لما مش بنلقيها معانا
whisper tangoo:
اكيد كل مرحلة من عمرنا فيها الحلو وفيها الوحش
وللما يتقدم بينا السن هنتمنى يوم من ايامنا الحالية تعود كما نتمنى الان ان يعود يوم من ايام الطفولة :)
شكرا لمرورك ياسكر ربنا يخليكي
Post a Comment