عاوزة اصرخ
ومش قادرة
جوايا صرخة مكتومة ونفسي افك اسرها واطلعها
ليه من بعد اي ضحكة لازم تنزل دمعة
ليه من بعد الفرحة يجي نكد
انا عارفة ان دي سنة الحياة
وان الحياة فرح وحزن .. ضحك وهم
لكن تعبت بجد
تعبت من حاجات كتير اوي
لما ارسم امل في بكرة وتيجي ايد تمسح الرسمة دي
يبقى بجد حرام
لما ابني قصور في احلامي والاقي ايد بتهد القصور دي
يبقى بجد حرام
لما افتح قلبي واقول هداوي كل جراحي وابدأ من جديد
والاقي ايد بتمسك سكينة باردة وبتقطع في قلبي وانا مش قادرة حتى ادافع عنه
يبقى بجد حرام
لما يكون فيه ايد بتتمد ليا علشان تاخدني من اللي انا فيه .. وانا خلاص هروح معاها
والاقي اللي يشدني ويبعدني عن الايد دي
يبقى بجد حرام
لما الاقي نسمة فرحة بتهل عليا واجري علشان افتح لها الشباك يمكن تدخل
والاقي ريح قوية تبعدها عني وتاخدها بعيد
يبقى بجد حرام
لما يتطلب مني اني اتعامل كدكتورة كبيرة ناضجة
وفي نفس الوقت الاقي معاملة كطفلة صغيرة مش من حقها تحدد حياتها ولا تاخد قرار
يبقى بجد حرام
لما حد يأذينا ويقول انه بهدف الخوف على مصلحتنا
ماهو احنا برضه كبرنا ونعرف مصلحتنا
بجد حـــــــــــــــــــــــــــرام
وكفاية بقى ...كفــــــــــــــــــــاية
4 comments:
مالك بس يا حبيبتى
هونى ع نفسك يا جميل
انتى قلتيها ان الحياه حزن وفرح
لو بتمرى بوقت صعب ان شاء الله هيعدى الوقت ده وكل حاجه تتحل
اهدى واصبري وادعى ربنا كتيييير انه يهون عليكى كل صعب
ربنا يفك كربك ويفرج همك
I miss u so mucccccccccccccch
semsema:
انا فعلا تعبانة اوي اليومين دول وبمر باصعب مواقف في حياتي
ربنا وحده هو اللي قادر على حلها
وانا معنديش غير الدعاء : ربنا يفك كربي وكرب المكروبين كلهم يارب
دعواتك
...
على فكرة انتي كمان وحشتيني اوي ربنا يخليكي يارب
ربنا يكرمك يارب ويفك كربك
ان بعد العسر يسرا ان شاء الله
ربنا يكرمك يارب
ربنا موجود
شكرار لمرورك واهلا بكي
Post a Comment